Roti Vorstadt
(Banlieue rouge)

Si wohnt i de Cité Lénine
Ere gwöhnliche Vorstadt
Zwei Zimmer und d´Chuchi
Kanapee, Chüelschrank
Würdi lieber
I de Cité Mireille Mathieu wohne
Si weiss wenigschtens wer das isch
Und s´isch wahr dass das besser usgsäch
Uf de Visitechärtli
Wo sie nie brucht
S´würdi echli blaue Himmel
Uf d´Gasrächnige bringe
Sie wird mit de Gwerkschaft drüber rede
Wänn sich´s git

Si wohnt irgendwo
Inere rote Vorstadt
Aber si wohnt nienets
S passiert nie öppis
Für sie isch d´Vorstadt immer grau
Wiene Fabrikmur, wienes Graffiti

Si isch föifefüfzgi
Hät vier Chind wo furt sind
Kein Ma meh, kein Fründ
Und dänn was, Schmuck?
S git nume ihren Goldfisch
Wo ihre e kei Sorge macht
S git nume Nächt
Wo sie ihn sich bewege ghört
Si staht uf zum go luege
Ob er nöd furt seg
Nacher hät si uu lang
Zum iischlafä, oh la la!
Si versuechts mit Guy Des Cars
Aber si verstaht nöd alles

Si wohnt irgendwo
Inere rote Vorstadt
Aber si wohnt nienet
S passiert nie öppis
Für si isch d´Vorstadt immer d´Zone
Au wänn s´i ihrne Auge echli gäle Sand hät

Si schafft jede Tag
Si hät en super Job
Ufem Parkplatz vom Carrefour
Sammlet si d´Wägeli zäme
Am Wuchenänd isch´s d´Höll
Wänn all die Pariser
De Kofferruum
Vo ihrne Peugeot 504
Mit füfzäh Tonne Wöschmittel fülled
Mit Huufe vo Fleisch
Im Fall vo Chrieg, im Fall vo Krise
Oder Sieg vo de Linke
Vo dem Spektakel wird´s ihre schlächt
Dänn dänkt sie a die Type
Wo agfange händ z´stähle
Si verstaht besser, warum

Si wohnt irgendwo
Inere rote Vorstadt
Aber si wohnt nienet
S passiert nie öppis
Nume s´blaue vo de Töff füehrt si i´d Ferie
Ihri Liebesgschichtli läbt si im Confidence

Si hät scho ihri chline Froide
Mangels Glück
Wänn si ihri Chatze füeteret
Wänn si mit ihrne Blueme redt
Jedi Wuche im Lotto
Setzt si zäh oder zwänzg Stutz
Si spilt uf ihri
Chrankekassenummere
S´isch nöd schwirig s´isch nöd tüür
Aber es bringt nüt
Und dänn lost si no Radio
Vor allem Michel Drucker
Will sie en sehr hübsch findt
Und überhaupt nöd vulgär

Si wohnt irgendwo
Inere rote Vorstadt
Aber si wohnt nienet
Es passiert nie öppis
Zwüschem Gipshund uf em Fernseh
Und de Kastagnette a de Stubewänd

Bi ihre häts Linoleum
Aber muesch Rollschueh näh
Dusse isch es zimli strub
Drum mueses dine guet si
Es stinkt nach Chatzepisse
Aber da chamer nüt tue
Da hackt mer nöd dran ume
Si seit dass si uf jede Fall
D´Mänsche nöd gern hät
Aber trotzdem hät si de Herrgott
Über ihres Näscht ghänkt
Si glaubt dra wänns eso wetsch
Aber s´isch nöd gägesiitig

Si wohnt irgendwo
Inere rote Vorstadt
Aber si wohnt nienet
Es bewegt sich nie öppis
Für si isch d´Vorstadt immer grau
Wie e Schuelhuusmuur, wienes Graffiti